الاثنين، 3 فبراير، 2014

تكون او لا تكون ...


0
قال لي صديقي وهو في بداية دراستة الجامعية بكلية الطب : انا حابب الكلية لكن الي مكرهني ف كلمة دكتور ان ماما مصممة تجوزني لدكتورة زي اخويا الدكتور الي اتجوز دكتورة واختي الدكتورة الي اتجوزت دكتور ...
المشكلة ان صديقي ده فضل مصمم انه ميرتبطش بأي زميلة له ف الطب ...وف الاخر بردو اتجوز زميلته ...الدكتورة ...!!

&&&&&
 منطق غريب عايشين بيه ان من يكون والده طبيب يصبح طبيبا
والده مهندسا يصبح مهندسا
والده مدرسا يصبح مدرسا
وحتي مدير الادراة  يصبح ابنه مدير ادارة
طب لية كنا مستغربين ان جمال مبارك  كان عايز يبقي رئيس ...!! _ مع نفي التهمة عني ان  مؤيدة للكلام ده لا سمح الله -
ما ابوه رئيس يا جماعة الطبيعي في مصر ان الولد يطلع لـ أبوه 
*****
هكذا نحن ....
لا نري ابعد من انوفنا...
مبنبصش لبعيد ولا بنبص لمستقبلنا صح ولا بنعرف ازاي  نكون احنا مش نكون نسخ مكررة 
لكن لو بصينا للناس البسطاء  هتلاقي الاب بيقول لأبنه : انا عايزك تتعلم وتتفوق وتكبر وتكون احسن مني ومن كل الناس مش عايزك تطلع فلاح زي  لاء انا عايزك تكون حاجة كبيرة ...
بردو هنا  عايزين يعملوا نسخ تانية  علي مزاجهم ...
مش عايزينك تكون انت زي ما انت عايز ...لاء... عايزينك تكون زي ما هما عايزين ...
مش عاطينك الفرصة حتي انك تفكر ...انت تحدد مصيرك انك تختار انك تقول انت عايز تكون إية ....
احيانا كتير الاهل اوالاصدقاء  او المجتمع مش بيعطيك الحق انك تقرر انت عايز تكونإية ...الظروف والملابسات بتاعت الحياة بتفرض عليك سيطرتها  وبتخليك تعملي الي هي عايزاها مش الي انت عايزه....
%%%%%
طيب ولية نعمل كدة ....؟
لية منتحداش كل شييء عشان نكون زي ما احنا عايزين ...
احدي جيراننا  اغصبوا ابنتهم التي حصلت علي مجموع عالي جدا بالثانوية العامة لدخول كلية الطب   برغم انها كانت تريد دخول كلية العلوم لانها تريد ان تصبح مثل الدكتور احمد زويل  مثلها الاعلي في الحياة العملية ...لكن ضغوط الاهل  والاصدقاء والجيران  ومكتب التنسيق كان  لهم رأي اخر فكيف لتلك المجنونة  ان تدخل كلية العلوم وهي حاصلة علي مجموع الطب بجدارة  _ يا بنتي لقب دكتورة ده مغري انت عبيطة وبعدين ده الي مبيوصلش للطب بيدخل علوم عشان يطلع يعمل معمل تحاليل ويقولولو ا يا دكتور وانت متبطرة ع النعمة ...والله انت فقر _
والمسكينة تبكي يا ناس ما دكتور زويل  دكتور ف العلوم وخريج كلية العلوم  والا يعني لازم اشيل شنطة وسماعة عشان استحق لقب دكتورة .....
$$$
تاني افكر ...
هي نظرة المجتمع
والا هي  تقاليد وعادات 
والا هي ثقافة مجتمعية 
والا ....










هناك 3 تعليقات:

  1. كلامك كله صحيح
    وكتير أوى نلاقى ان الإبن لازم يطلع زى الأب
    بس مش فى العموم
    الحمد لله الكلام ده مش بينطبق على كل واحد عندنا له مجال دراسه مختلف خالص
    بس يمكن ظروف مجتمعنا كانت السبب فى ده

    ردحذف
  2. السلام عليكم
    ازيك يارحاب
    من زمان نفسى ادخل مدونتك بس مكنتش بتفتح معايا خالص
    لكن الحمد لله عرفت ادخل مدونتك
    وفى الحقيقه احب ان يكون بيننا تواصل دائم
    فى الحقيقه انتى كتبتى عن قضيه مهمه جدا فى مجتمعنا والقضيه دى معتمده اعتماد كلى على عادات وتقاليد ومفاهيم راسخه فى عقول ناس كتير مش ببتغير
    ومش بس البنت اللى بيتفرض عليها اختيارات الاهل الجبربه لاء ده احيانا بيكون الشاب كمان
    فعلا شىء محزن
    اما المهندس ميتجوزش الا مهندسه
    والدكتور يجوز دكتوره زيه
    والمطلقه تجوز مطلق زيها ولو صادف ان مطلقه اتجوزت عازب تبقى كارثه وكل الناس يكلموا عليها
    والارمله تجوز ارمل او مطلق ايضا
    وهكذا وهكذا من المفاهيم والافكار المتخلفه فى مجتمعنا
    وكتير احنا بنفذ للناس رغبتهم من غير ما بنسأل نفسنا احنا فعلا عايزين كده؟
    احنا فعلا بنحب كده؟
    اعجبتنى مدونتك جدا
    وانا هضيف مدونتك عندى لاتواصل معاكى
    وادعوكى لزياره مدونتى عشان تشوفى اول بوست كتبته قبل ما انزل البوست الجديد
    تحياتى

    ردحذف
  3. جميل أوي تريف المدونة في رأس الصفحة ...
    والعنوان بتاع التدوينة دي جيد جداا
    أما المحتوى ففي نقاشات وكلام واختلاف في وجهات النظر
    لكن مجمله يحمل عرضا لمشكلة تقابل الكثير منا

    -----------------
    سعدت بتواجدي .


    محمد .

    ردحذف

هنا ...ممكن تقول .... الل بقلبك
يمكن حد يفهمك
لآن في وقت بنعرف نقول فيه الي بنحسه
لكن في وقت بنشوف ومبنعرفش نقول