السبت، 14 يونيو 2014

سفر ...1


اذا كنا ندون عن السفر ....فالجميع حتما سيقرررون السفر خارج مصر 
الا أنا....
فأنا عندما اقرر السفر سأسافر داخل مصر 
مصر من الداخل ... وتحديدا  مصر من جوه....صعيد مصر 
الاقصر ... يمكن من زمان اووي من اول مرة درست تاريخ  وانا حبيت الاقصر عشان الاثار الي فيها 
بعد كدة لما قرأت قصة " سر القصر " لنبيل فاروق صممت اني ازور الاقصر وازرو القصر ده " قصر الدندراوي "
 ده غير طبعا  ان الاقصر  فيها  اثار تخلي اي حد  يروحها يحبها ويتمني يعيش فيها علي طول بعيد يعني عن ان الجو حر وكدة يعني  
في وقت من الاوقات  تخيلت اني هتجوز وهعيش في الاقصر .... الناس كلها تقولي اعيش ف اسكندرية وانا اقولك لاء الاقصر 
وقررت ان شهر العسل يكون عبارة عن زيارة كل الاماكن الاثرية هناك وطبعا  اروح قنا وازور قبر امل دنقل ...واكيد صديقي  " شاذلي دنقل " الي امل دنقل يبقي عمه هيستضفني هناك واتعرف علي العائلة العريقة 
في بداية الرحلة انا سأصطحب موناليزا  صاحبة مدونة حوليات مونايزا وأمة الله   علي صحبتي في هذه الرحلة  فهي صديقتي التي احب واعرف انها ستوافقني علي جنوني  
وسيكون معنا في الرحلة القناوي  صاحب طير الرماد  " مصطفي سيف " علي الاقل هو من قنا وعارف  جبال  وسهول البلد 
وطبعا لا يمكن اني اروح الصعيد واسيب " ياسين احمد سعيد " السوهاجي الصميم  ووصديقي  واخي  الصغير  
ولاني معرفش  الصعيد خالص  كل الي اعرفه عنه ان المسافات طويييييييييلة وبعيييدة  بس هكون سعيدة جداا 
سعيدة اني مع موناليزا  وسعيدة اني هغتت علي مصطفي سيف   صحيح مش هضمن اي اكل  منه لانه بياكل حاجات غريبة كدة ...بس علي الاقل   ياسين مش هيخلصه اني اموت م الجوع وهصعب عليه  انا ومني
اول حاجة هعملها اول ما انزل مطار الاقصر  ان شاء الله  هــ شتري شيكولاتة  من نوع معين بفتكر حد بيها  وهشتري نوع تاني لمني وياسين ومصطفي ...بس مصطفي اكيد مش هيوافق علي واحدة بس  وهياكل كل الشيكولاتة الي معانا
هطلب من مصطفي سيف انه ياخدني علي مستشفي الدكتور مجدي يعقوب  لاني نفسي اشوفه اوووي  واتعرف عليه  واقعد معاه كتير جدااا  مصطفي هيقول " اية البنت العبيطة دي " يا بنتي احنا في قنا  ومجدي يعقوب في اسوان انت عارفة المسافة بين قنا واسوان اد اية ...؟  هبتسم ببراءة واقوله " لاء اصل انا مبعرفش في الحساب  "
هخلي ياسين و مصطفي  ياخدونا علي قصر الدندراوي واتأمل كل جزء فيه ... وهزور كل الاثار الموجوده  في الاقصر ... بس اهم من ده كمان اني اشوف البلد وطبيعتها والناس الي فيها واتعرف عليهم  لان الناس كنوز 
صحيح مصطفي مش بيطيقني اصلا وبيحس اني كائن غريب   بس اكيد هو صعيدي اصيل وكريم ومش هيزعلني 
ياسين عارفة ومتأكدة انه بيحبني لاني اخته  زي ما هو اخويا  وعارفة انه  هيعرفني علي الحاجة والدته  الي اكيد هصعب عليها وتقول  بحسرة كدة " ايوة علي بنات بحري  الي عاملين زي عود القصب الممصوص  "   بس اكيد هتنبسط بمني لانها بنوتة بتدخل القلب بسرعة
انا اخترت رحلة داخلية  ....جوه مصر... لمكان بحبه  ولي ذكريات فيه حتي لو افتراضية ... 
اخترت صديقة بحبها هي مني ...وصديقين من أعز اصدقائي ... مصطفي و ياسين  وبتمني فعلا اني اعمل الرحلة دي 
يارب اكتبهالي
الرحلة او المكان مش بيكون بالحاجات الي فيه علي اد ما بتكون  بالناس الي فيه  وذكرياتنا فيه 
وانا عندي ذكريات بعيدة عن الاقصر ..بتمني اعيشها فيها بجد مش افتراضي

هناك 3 تعليقات:

  1. يااه طيب انا ممكن اجى معاكى انا من عروس الصعيد المنيا انا عارفه انك كريمه وهتخدينى معاكى ماشى وبالمرة بعد الاقصر نطلع على الغردقه من جو الى جو تانى بقا بس شكل الرحلة من البوست بصراحة روعه وانا اهو اختك الصغيرة ومس هعمل ازعاج نهائى هههههه
    تحياتى

    ردحذف
  2. سوهاج وقنا والأقصر وأسوان كلها بلاد جميلة وناسها أجمل وأجدع وأطيب
    :)
    المهم ما تنسوش صور الرحلة لما تروحوا إن شاء الله
    :)

    ردحذف
  3. إيه الفسحة والصحبة الحلوة دي :)
    أنتي عارفة المشكلة فى رحلتنا دي إيه؟
    إن مصطفى وياسين اللي أنتي معتمدة عليهم وارد جدا ما يسألوش فينا ويسيبونا نكتشف الصعيد لوحدنا :) بس علشان شهامة وجدعنة الصعايدة هيقترحوا أن لو تهنا ولا حصلنا أي حاجة نبقى نديهم رنة :)

    شوفي رحلتي في الصعيد اللي عملناها ع الجروب ^_^
    http://365-posts-110.blogspot.com/2014/04/blog-post_3.html
    كنت وقتها زعلانة من ابراهيم ومارضيتش أسافر معاهم ^_^

    ردحذف

هنا ...ممكن تقول .... الل بقلبك
يمكن حد يفهمك
لآن في وقت بنعرف نقول فيه الي بنحسه
لكن في وقت بنشوف ومبنعرفش نقول